Un tren de Feve llega enantes d’hora a destín.

Conmoción ente los usuarios del Semidireutu Nava – Uvièu qu’aportó ayer a la capital con tres minutos d’adelantu.

Unes venti persones que garraren ayeri’l tren de Renfe Anchu Métricu, enantes conocíu como Feve, ente Nava y Uviéu, que sal a les 15:21 de la capital de la sidre, quedaron clisaes al llegar el ferrocarril a les 15:56, tres minutos enantes de lo que trae nel horariu, y unos ocho enantes de la hora normal. “Inda toi en shock fía, esto nun pué ser, agora tengo que dir a tomar un café a La Paloma pa facer tiempu”, declaró Purita Tresguerres, vecina de Los Corros que garra’l tren de vía estecha pa consultes esotériques na capital.

Fuentes consultaes per esti diariu confirmaron l’arribada del tren enantes de hora, y aseguren que’l maquinista respetó les llendes de velocidá afitaes. Un vozeru de la empresa, informó que tán faciendo una gueta de datos col oxétivu de facer unes nueves midíes de conducción con intención de torgar a los conductores de trenes de llegar con menos de cinco minutos de retrasu. “La gente confía en nuestra capacidad para llegar tarde y que el tren se averíe. No podemos generalizar este tipo de conductas que nos llevarían a que disponer de servicios fiables y atractivos para el viajero, lo que aumentaría la ocupación del servicio”, declaró’l portavoz de la empresa. Fontes extraoficiales, aseguren qu’al conductor del convoi, abriéron-y espediente por conducta anómala.