Sosprendentes pruebes de Carbonu 14.

ESTUDIOS AMUESEN QUE XUAN XOSÉ SANCHEZ VICENTE LLEVA NA POLÍTICA MÁS AÑOS QUE JORDI HURTADO NA TELEVISIÓN.

XX

 

Recientes estudios de la  Universidá de Blimea Ecuatorial a los que tuvo accesu esta redaición, amuesen resultaos increyibles a les prebes de Carbonu 14 feches a la barbuca rala de Xuan Xosé.

Nel Top 3 de coses vieyes atopaes na Península Ibérica constaba una uña de Jordi Hurtado, un refaxu de Josefina Martínez, y les güeyeres d’Alvarez Cascos. Tres esti descubimientu, el pelu de barba de Xuan Xosé será la cosa más vieya atopada na península, y de fechu, d’Asturies.

El catedráticu que fizo l’analís, d’apellíu Cañedo, nun descarta nenguna vía d’investigación tres esta descubrición. Amás recalca qu’habrá que revisar tola hestoria d’Asturies, dende Pelayu (que podía ser un nomatu y nomáben-y “roxu” por dalgo) hasta’l Conde de Toreno. Nun se descarta tampoco que la película “Highlander” (Los Inmortales) tea basada na so vida. El so direutor, Russell Mulcahy, nun quiso confirmalo faciendo dellos esparabanes señalando al so garguelu.

Per otru llau, sabemos que por mor d’esta noticia, Xuan Xosé yá ta trabayando nel so nuevu llibru: “Yo-y despliqué a Xesús de Nazareth la Llei del Bable”, col qu’espera vender ainda más que cola so “Antoloxía Poética” (con 5 exemplares algamó númberu 1 en ventes n’Asturies) y nun descarta firmar llibros en “LibroOviedo” al llau de Belén Esteban.

 

Quiciabes te preste tamién...