El gobiernu del Principáu convoca’l concursu de redacción del pautu de gobiernu de 2019.
Primera midida del presidente Griste y el so “nuevu equipu”.
Yá puede alcontrar nel BOPA de güei les bases del XI Premiu Javier Fernández pol que s’escoyerá la redacción del pautu de gobiernu 2019-2023. En diches bases figura que la estesión del mesmu tien de ser menor de 11 fueyes y almitiránse obres escrites n’español d’España y español con alfabetización internacional. El premiu consistirá nun puestín y nunes perres que variarán según el conteníu de la redacción.El ganador, sumaráse a la llista de premiaos ente los que figura Gaspar Llamazares na última edición cola obra con títulu “Que vien la derechona” y al so predecesor Nacho Prendes con “Duernu pa trés”. En 2011 la edición quedó desierta al considerar el xuráu que la única obra presentada por Francisco Álvarez-Cascos “Xovellanos y yo” nun yera merecedora de los sos favores.Esti prestixosu premiu que se concede n’honor de mayoríes lleva afitáu n’Asturies yá per delles ediciones y fallaráse en La Gruta el primer fin de selmana de setiembre. N’otres ediciones esti premiu facíase coincidir cola fiesta minera asturleonesa de Rodiezmo, pero van delles ediciones ensin que seya asina por mor d’un cuadru confusional.
Pesie al prestixu nun dexa d’haber dalgunes personalidaes crítiques col mesmu como Xuan Xosé Sanchez Vicente, que dedicó la so apaición biañal pa afirmar que “yo pa eso nin me presento” o Francisco Javier Valledor que mostró les sos reticencies tres la so participación nel premiu de 2007 na obra ganadora “El camarote de la Izquierda Plural”.
Per otra parte, personalidaes como Victor Manuel o Pedro Almodóvar confirmaron la so asistencia a la gala d’entrega del premiu.
