Pedro Sánchez, signifer pola oficialidá.
El secretariu xeneral de los socialistes enquivócase otra vez y acaba na manifestación d’Uviéu.
Mar A. Ñuela
Ablucaos quedaron los miles de manifestantes qu’ayeri se reunieron, como tolos Díes de les Lletres Asturianes n’Uviéu al ver apaecer a Pedro Sánchez, secretariu xeneral de los socialistes. El líder políticu, dau, como’l partíu que dirixe, a confundir la izquierda cola derecha y los botones de la camisa colos de la chaqueta, confundióse de ciudá y acabó recalando na capital asturiana y guiándose pol xaréu de les gaites.
“¿Ónde ye l’actu?”, informóse. “Como tolos años, nel Teatru Campoamor”.
El lider posó del coche y en viendo’l recibimientu (cola Bandona de Gaites pola Oficialidá) enllenáronse-y los güeyos de llárimes y pidió dir el primeru, cola bandera grandona d’Asturies ximielgándola.
“¿Por qué será que tolos piraos se nos axunten?”, reburdiaben los asistentes a la manifestación.
Sicasí, l’asistencia como signifer Pintaius de Pedro Sánchez provocó un estáu d’ablayu xeneral non solo na manifestación sinón tamién na cai Uría. Muncho del funcionariáu que salía de trabayar o que taben tomando la merienda decidió xunise a la Manifestación diendo detrás de Pedro Sánchez.
“Tán acabante publicase les últimes encuentes y el PSOE va tar otra vez caciplando, asina que convién tar visible pa los puestinos de salida. Suelen movese munchos sillones y muncha xefatura de serviciu”, confesó Otilio Reinares, auxiliar administrativu en Vivienda, que prefier permanecer nel anonimatu.
Hasta dalgunes muyeres que salíen de taben acabante salir de la peluquería se sumaron a la marcha por ver tan de cerca a daquién que sal na televisión y nos papeles.
“La verdá ye que na tele paez más guapu, porque tar, ta como una xiblata, fíu.
Conozse que yera de los de dexar comida en platu. Malcriáu, mira, nin culu, nin chicha nin llimonada tien siquier”, dicía Josefina M., de San Cloyo, pero residente n’Uviéu dende va dalgunos años.
“Esto nun ye más que un boicó; primero fueron los podemites llevando l’actu inaugural pa Xixón a la mesma hora, y agora los socialistes mándenos a esti puntu pa desacreditanos”, diz Paulo Ramírez, versificador asturianu.
Demientres la llectura del manifiestu de la Xunta Pola Defensa de la Llingua, nun dexó de mover la bandera, como en cualquier actu electoral y depués entró nel Teatru Campoamor onde aguantó d’un tirón l’entamu musical, la Xunta Estraordinaria, la esbilla de poemes y l’actuación musical de Xuacu Amieva, ensin gutiar. Yá entós debió decatase de que se confundiere, como llueu fizo saber a esti mediu.
“La verdá ye que fue un actu guapu y emotivu. Por coses como estes vos digo que la monarquía ganóse’l respetu del pueblu, magar los fondos raigones republicanos del mio partíu”, declaró cola voz tomao d’emoción na espicha, sintiendo a la Bandina Turcipié. “Los Premios Príncipe d’Asturies coloquen a Asturies nel mapa”.
Al cierre d’esta edición llográbemos contactar colos socialistes asturianos. Foi un F. Lastra más encabronáu de lo normal el de tomar el teléfonu y comentar, “nun sabemos si esti puntu ye demasiáu tontu o demasiáu llistu”.
En preguntándo-y pola reacción del candidatu, Javier Fernández, Lastra comentó: “¿Cómo queráis que tea? ¡Como siempre! Nun se-y adivina sentimientu humanu al puñeteru!”
Dende la formación lila movieron ficha al conocer lo de Pedro Sánchez. De primeres asaltaron los ALSA pa dir hasta Uviéu y declarar la so adhesión al movimientu asturianista. Diben conectase al WIFI p’actualizar darréu tolos círculos de twitter y facebook, pero nun solo nun lo consiguieron sinón que sobresaturaron el circuitu
elléctricu del ALSA que fundió n’autopista.
-¡Madre que los parió! Media hora col tiquitiqui de los coyones ensin dase cuenta de que tábemos paraos. Y yo ensin poder poner la lona.”, protestaba Herminio Cares, conductor. -Y llueu pósense too y entamen a caminar pela autopista xenerando esa retención.
La escena dantesca paecía sacada de la cuarta temporada de The Walking Dead, provocando desmayos ente los conductores.
Iñigo Errejón, director de campaña, argumentó: “El WIFI del Alsa ye casta”.
