Declaraciones ESCLUSIVES DE SAN PEDRU: “DEXAMOS PASAR A HERMIDA POR PESÁU”.
A les 8:00 de la mañana, entrónos una llamada a la redaición d’ún “númberu priváu”. Cuando yá entamábamos a reburdiar por mor d’una promoción del móvil, sentimos: <<Hola, soi San Pedru, quiero facer unes declaraciones>>.
Notábase al paisanu pel teléfonu dalgo fadiáu, como si tuviere daqué baldáu. Asina que-y dexamos que falara: “Toi estragáu. Paezo más un porteru discoteca que’l guía qu’afaya la xente namás morrer. ¿Podéis falar col Papa ési que tenéis pa qu’enguedeye les condiciones pa entrar nel cielu? Ye que dende qu’abolió’l Purgatoriu ya’l Limbu esto nun ye lo mesmu. Vaya casa putes, con perdón. Porque yo voi dimitir. Y si dimito, voi sacar tolos trapos sucios y va armase la de la Virxe María, que tamién tien lo suyu, eh.”
“Ayeri de nueche llegónos al cielu’l tal Hermida esti, bastante desmangáu por ciertu, pero bonu, chapa y pintura y da pa una eternidá. Tenía un informe afayadizu del nuesu representante n’España, un tal Rouco Varela, que dicía un curtiu: “dexáilu pasar, ye de los nuesos”. Pero entamó a falar, y a falar, y a falar, y a falar; entamó cuntame sobre les “moces d’Hermida”, guapes, pizpiretes y mocines; y voi dicivos una cosa, soi abierto pa munches coses, equí tenemos reciella de toa triba, pero poles orxíes nos camerinos nun paso. Una eternidá enllena de castidá, priváu de tolos placeres de la vida, pa que llegue un vieyu que fala raro, con tupé, mira inclináu como la madre’l rei, o la güela, que la mui desgraciada vixilame tolos díes si camudé los calcetos o non; a dicime que si Nieves Herrero, que si Irma Soriano, que si Consuelo Berlanga, que si Miriam Díaz Aroca, que si ¡¡¡¡Mariló Montero!!!! Esti paisanu fizo más dañu a la humanidá que Hitler, Gadafi, Franco y Alarcos xuntos!”
“Asina qu’hincháronseme los simones y dixi-y que non, que nun podía entrar, que falara colos d’abaxu, que de xuru que yeren más del so palu; y ehí entamó la cosa a ponese seria … Falóme que tenía “amigos” que taben a piques de ‘acompangalu”. Díxome que cuando viniere’l Rei d’España iban camudar munches coses equí. Yá sabes, con esi tonu amagazáu ensin amagazar.”
“Y agora teo mieu, munchu mieu … poles nueches oigo voces nánares, diciendome “pozque no te callaz”, la ma del paisanu esi, envede mirame pa los calcetos xubió un pocu la güeyada y mira pa los simones … Fui falar con Dios y taba ocupáu con nun sé qué movida d’unes plaques teutóniques nel Nepal … Asina que namás me quedáis vosotros, voceru independiente d’Asturies, y por ende, del mundiu. ”
“¡¡Ayuda-yme polo que más queráis!!”
