TRES ESTUDIANTES DE PÉRITOS INTENTEN MONTAR UNA PANERA D’IKEA

Sálen-yos tres horros y entá-yos sobren pieces.

panera

 

“Les instrucciones taben n’ayerán y yo soi neofalante”, diz Borxameri, el xefe d’equipu.

Borxameri, Yonazan y Kevin Corner (bendita la gracia del cura que lu bautizó) presentaron a proyectu fin de carrera conxuntu el proyectu pa facer una panera y poder presentala al proyectu d’innovación “Ideas con IKEA”.

La multinacional danesa nagua incorporar asina al so mundu nórdicu idees y proyectos d’aquellos llugares onde s’implanta. Hai dos años, por exemplu, ganaron los franceses con un proyectu de Torre Eiffel alicatada que servía como bañu pa pisos de solteru; l’añu pasáu foron los xaponeses los que ganaron col proyectu de cama tradicional (esto ye, una manta en suelu) y esti añu’l xuráu dio’l vistu bonu pal proyectu de los tres asturianos que col proyectu “Pa Nëra” consiguieron la beca “Móntatelo tu mesmu” pa diseñar una mesa apilable que sirviere como despensa, mesmu usu que nel mobiliariu tradicional.

Guiáronse poles paneres de la zona mariñana, meciendo estilos de la panera carreña y maliayesa, y, nel primer prototipu, atoparon la sorpresa.

“Cuando nos punximos a montala decatémonos de que nos sobraben pieces. El casu ye que mirábemos les instrucciones, que taben redactaes n’ayeran por Yonazan, que ye de Casomera, y paecía simple. Hasta’l paisanu del dibuxu traía la montera puesta, ensin despeinase”, aporfía Borxameri, que nun ye quien a desplicáselo.

Como vieron que nun yeren pa ello, decidieron pagar el serviciu de montaxe y los rapazos llograron sacar tres horros enteros, ún d’ellos con seis pegollos pero base cuadrada; otru de fisionomía pongueta y el terceru de la zona centro. Entá asina siguíen sobrando pieces.

“Mandémoslos aparar. Esto corría riesgu d’acabar paeciendo Sietes en Villaviciosa o Espinaréu, en Piloña”

En realidá, teníen mieu que, de siguir saliendo horros, acabaren en Combarro.

L’ablayu percorría a los tres estudiantes que nun sabíen bien qué veredictu –yos diba dar la empresa.

-Fueron munches tardes de comer tortines y el menu de pasta con cebolla caramelizao, y yo volvime adictu a los xelaos de cincuenta céntimos-diz un Kevin Corner oyerosu y con un pinchu de salchicha remoyada en xeláu envede ketchup.

Con too y con ello, esta mañana llegó’l veredictu de la empresa. Compren la patente .

“Dieron xusto col espíritu de la empresa”, diz Jëan Sahz Thori, xefe de comunicaciones d’IKEA pa España.

“Nos muebles nun sacamos un perru, pero na mano obra y nel porte, facémonos ricos.”

 

Quiciabes te preste tamién...