ULTIMA HORA: SUSPÉNDESE’L PARTÍU UVIÉU-CÁDIZ

LA NOTICIA GARRA DE SORPRESA A LOS UVIEISTES

TARTIERES

Esti domingu diba xugase’l trescendiente partíu d’ascensu a Segunda División ente’l Real Uviéu y’l Cádiz C.F. Dicimos, diba xugase porque acabamos recibir una nota curtia del Presidente del Cádiz C.F. que reproducimos nesti mediu:

“Asturianos y asturianes:

Lo primeru, prestaríanos felicitavos pola bona temporada que tais faciendo. Habéis de cuntame qué ficisteis pa que’l mexicanu picara y punxera perres a esgaya porque nós tantiamos a 4 xeques y nun hai manera …

Nun vamos poder xugar el partíu de la fase d’ascensu a Segunda División, y espero qu’entendáis les causes fonderes que nos lleven arrenunciar al partíu, y ye que llego-nos al Club l’horariu pal partíu y vimos ablucaos que quieren que xuguemos a les 5 la tarde.

¡¡LES 5 LA TARDE!! ¡¡TAMOS LLOCOS O QUÉ!! A les 5 la tarde la plantiya ta durmiendo la siesta. Y si nos quiten la siesta, ¿ónde vamos? Asina que ñegámonos a xugar nesi horariu.

Pellí abaxo entamamos a ser persones a partir de les 10 de la nueche. ¡¡Qué mi mantu ye eso de xugar de día!!!

Una pena, porque tábamos perilusionaos por saber a qué sabe l’agua dulce, qué ye eso de la lletricidá y teníamos gana xintar un platu que nos recomendaron encarecidamente, un tal Abelardo Caleya.

Salú ya Dixebra.

Manuel Vizcaíno. Presidiente’l Cádiz F.C.”

[Nota de redaición: la nota orixinal taba escrita nun idioma perraru imposible de lleer, gracies al equipu d’Eslema (Universidá d’Uviéu) fuimos capaces de pescanciar daqué del escritu. Ainda hai dellos fallos, por exemplu, la despidida: “Zalúmiarma” traduzla por “Salú ya Dixebra” ]

ULTIMA HORA: Carlos Slim viaxa esti sábadu a Asturies a solucionar el conflictu pa poder xugar el partíu. Según cunten nel Conceyu d’Uviéu, Caunedo coló pal Decatlhon a mercar unes rodielleres pa facer usu de la “xornada de reflexón”.

Quiciabes te preste tamién...