SOLLEVANTU NEL ALIMERKA

TERROR NEL ULTRAMARINOS.

Una caxera d’Alimerka nun diz “¿Tarxetina puntos, vida?” y crea una onda de confusión ente tolos usuarios.

El sucesu ocurría’l pasáu xueves nel Alimerka xigante de la Mayacina (Mieres), yeren les dos de la tarde y los trabayadores taben a puntu de camudar de turnu, cuando una muyer (A.P.F) vecina del conceyu y compradora habitual del llocal, diba cola barra pan de mediu y unes caxigalaines, pa la nieta, “Que güei xinta conmigo en casa, que la mio fía trabaya muncho y yo tengo que ayudala tolo que puea”, cuando dempués d’atopase con Puri la de Mateo, el de Figaréu, na estaya de perfumería, garró marcha y plantóse na cola pa pagar les sos coses.
La escena paecía dalgo normal, hasta qu’a la víctima llegó-y el so turnu y pasó les coses pola cinta de la máquina, poniendo’l separador y too pa que les sos coses nun se mecieren colo de la de detrás. La caxera, paecía normal ensín problema algún anque con cara cansada, el fechu trescurrío con tola naturalidá del mundu, la caxera metió-y les coses na bolsa y cobró-y ensín reparu.
La nuesa víctima, cola tarxeta puntos na mano, nun pudo facer nada, quedó n’estau de shock, cayó-y too y nun pudo facer más que repetir “Nun me dixo tarxetina puntos”, “nun me llamó vida”.
El 112 acercóse hasta’l super pa examinar a la muyer, llevala pa’l Hospital Álvarez Builla. El mélicu díxonos que nun yera nada, “Esta paisana tenía un cuadru d’estrés previu y el nun preguntái pola tarxetina puntos, foi un puntu clave pa que terminara d’alloquecer”.
Pela so parte, los responsables d’Alimerka, decidieron nuna reunión que dempués de tolo asocedío, toles caxeres/os tenían que dicir la ya famosa coletiya “¿Tarxetina de puntos, vida?” Pa evitar asina cualquier sucesu como esti.