Un descubrimientu que conmociona a la sociedá asturiana

Investigadores americanos creen atopar dalgo que dalguna vez pudo funcionar nel HUCA.

El conseyeru de Sanidá, Faustino Blanco, confirmó a fontes cercanes a la nuestra redaición la presencia nel HUCA d’un equipu d’investigadores americanos que taríen faciendo les práctiques post-doctoráu n’Asturies.

“Nun ye que desconfiemos de los investigadores asturianos, pero ye que tán toos pa fuera”, desplicó, “hasta los de práctiques”.

Esti equipu tien avanzáu un informe concluyente que fadrán públicu en breve, si ye favorable, y si non, yá si acasu.

“El casu, ye que podemos avanzar dalgunes conclusiones que desmitificarán la mala prensa qu’arrodia al HUCA desde la so construcción; en concreto, podríemos afirmar qu’esti equipu atopó dalgo que dalguna vez funcionó, anque falta por contrastar un par de pruebes.”, apuntó’l conseyeru a una interpelación parlamentaria que se ficiere en cuantes una puerta corredera atrulló la pierna de James F., un integrante d’esti equipu que cuásique pierde la pierna al quedar encerráu nel ascensor que lu llevaba a la sala d’operaciones y después la vida na inundación que sufrió’l corredor central, de la que diben camín del quirófanu.

“Oh, my god”, declaró James per móvil a esti periódicu, “y mio ma nun quería que fuere a los Sanfermines”

L’embaxador estauxunidense interesóse pol casu, lo qu’allevantó la esmolición del presidente del Principáu d’Asturies y de los xefes de los principales partíos de la oposición que ven, nesi afayu de daqué que dacuando pudo funcionar nel HUCA, una cortina de fumu.

A hora de pieslle d’esta edición, Nacho Prendes poníase en contautu pa facenos saber la so opinión: “Salven que nun toi yo ellí, que si non diben tener una Comisión d’investigación como Dios Manda.”